रेशन कार्ड : कोणाचे रद्द होणार, कोणाला मिळणार नवीन रेशन कार्ड?

रेशन कार्ड: महाराष्ट्र शासनाने आपल्या नवीन शासन निर्णयानुसार (GR) राज्यातील अपात्र शिधापत्रिका शोधण्याची मोहीम सुरू केली आहे. या अंतर्गत महाराष्ट्रातील सध्याच्या अपात्र शिधापत्रिका शोधून त्या रद्द केल्या जाणार आहेत. तसेच, पात्र लाभार्थ्यांच्या मागणीनुसार नवीन शिधापत्रिका देण्याचे निर्देश देण्यात आले आहेत.

राज्यात सध्या असलेल्या शिधापत्रिकांचा कोटा पूर्ण झाल्यामुळे नवीन लाभार्थ्यांना तातडीने रेशन कार्ड उपलब्ध करून देणे शक्य होणार नाही. त्यामुळे, अपात्र असलेल्या शिधापत्रिका प्राधान्याने वगळण्याची प्रक्रिया महाराष्ट्रात राबविली जाणार आहे. यामुळे गरजू व पात्र नवीन लाभार्थ्यांना रेशन कार्ड देणे शक्य होईल.

केंद्र शासनाकडून यापूर्वी प्राप्त झालेल्या निर्देशानुसार अपात्र शिधापत्रिकांचा शोध घेऊन अशा शिधापत्रिका रद्द करण्याच्या सूचना सर्व क्षेत्रीय कार्यालयांना वेळोवेळी देण्यात आल्या आहेत. सध्याच्या स्थितीत राज्यात देण्यात आलेल्या अंत्योदय अन्न योजना, प्राधान्य कुटुंब लाभार्थी (केशरी) व शुभ्र या सर्व प्रकारच्या शिधापत्रिकांची तपासणी करण्यासाठी दरवर्षी १ एप्रिल ते ३१ मे या कालावधीत शोध मोहीम राबविण्यात येणार आहे.

पहिल्या टप्प्यातील कामे (First Stage):

• सुरुवातीला सध्याच्या शिधापत्रिकाधारकांकडून आवश्यक माहिती घेतली जाईल.
• यासाठी ऑनलाइन पद्धतीने अर्ज भरण्याची सोय उपलब्ध करून दिली जाईल.
• या अर्जासोबत शिधापत्रिकाधारकांना त्यांच्या निवासस्थानाच्या मालकी हक्काचा पुरावा, एलपीजी (LPG) जोडणी क्रमांकाबाबतची पावती, बँक पासबुक, विजेचे बिल, टेलिफोन/मोबाईल बिल, ड्रायव्हिंग लायसन्स, ओळखपत्र (कार्यालयीन/इतर), मतदार ओळखपत्र, आधार कार्ड इत्यादी कागदपत्रांच्या प्रती सादर कराव्या लागतील. सादर केलेला पत्त्याचा पुरावा एका वर्षापेक्षा जास्त जुना नसावा.
• अर्ज भरल्यानंतर आवश्यक कागदपत्रे जोडून स्थानिक रेशन दुकानदाराकडे जमा करावे लागतील.

दुसऱ्या टप्प्यातील कामे (Second Stage):

• दुसऱ्या टप्प्यात संबंधित अर्जाची आणि अर्जासोबत जोडलेल्या कागदपत्रांची कसून तपासणी केली जाईल.
• या अर्जात किंवा जोडलेल्या कागदपत्रांमध्ये काही त्रुटी आढळल्यास, त्या दुरुस्त करून पुन्हा सादर करण्यास सांगितले जाईल.
• शिधापत्रिकाधारकांना कागदपत्रांची पूर्तता करण्यासाठी १५ दिवसांचा कालावधी दिला जाईल.
• या दिलेल्या वेळेत कागदपत्रांची पूर्तता न केल्यास त्यांची शिधापत्रिका रद्द केली जाईल.

तिसऱ्या टप्प्यातील कामे (Third Stage):

• या टप्प्यात विशेष काळजी घेऊन एका कुटुंबाला फक्त एकच शिधापत्रिका दिली जाईल, याची तपासणी केली जाईल. कोणत्याही विदेशी नागरिकाला शिधापत्रिका दिली जाणार नाही, याची दक्षता घेतली जाईल.
• अर्जदाराच्या पात्रतेनुसार शिधापत्रिका देण्यात येईल.
• या मोहिमेतून दुबार नावे असलेले, अस्तित्वात नसलेले आणि मृत व्यक्ती असलेले लाभार्थी वगळले जातील.

अधिक माहिती साठी आपण शासनाचा GR पाहू शकता.